鬍鬚曾喺預算案拋書包，引用詩句「偉大的市民成就偉大的城市」，呢句詩出自被喻為「自由詩之父」嘅美國十九世紀詩人惠特曼（Walt Whitman），詩句本來氣魄恢宏、豪邁激越，但係由鬍鬚曾把口讀出，即時乜feel都無晒。
其實，惠特曼呢句詩句仲有下半截，全文係：「偉大的市民成就偉大的城市：就算只剩下貧民窟，仍是全世界最偉大的城市。」鬍鬚曾只引用詩句嘅前半截，隱去咗後半句，有何考慮，只有佢自己心知，但文字係內心嘅鏡子，鬍鬚曾咬文嚼字背後，為政思路亦不慎露底，反映民間疾苦，對佢嚟講根本視如浮雲，不痛不癢，最緊要成就佢心目中嘅偉大功業，守住庫房做守財奴，唔怪得預算案對窮人咁孤寒啦。
惠特曼喺廢除奴隸制上立場反覆，令其生平頗具爭議，但一樣飲美國水長大嘅鬍鬚曾，為官功過應無爭論，肯定係被一面倒勁彈！