政情：黑英：政府公信何在
前天文台台長林超英退休唔係近日嘅事，不過佢一直冇加入退休高官合唱團批評政府，因為認為自己既然已經係局外人，指手畫腳唔係好適合，但係容忍係有限度嘅，喺英皇書院縮班嘅事件上，佢挺身發聲，係為咗唔想自己嘅母校縮班減位，減少好學生入讀好學校嘅機會。尋晚佢知道政府終於「幫」英皇揸主意決定減班，佢嬲到幾乎要爆炸。
林超英尋晚喺佢嘅網誌話，「如果早已決定，幾個月以來的所謂諮詢，所為何事？（是否）粉飾民主櫉窗？」佢話英皇校友由始至終保持低調，不搞示威，不搞衝擊，堅守冷靜地擺事實講道理嘅原則，嚴格遵循成熟自由民主社會嘅議政方式，希望政府以同樣嘅方式回應，結果有目共睹，就係大石砸死蟹。林超英慨嘆：「政府公信何在？誰還會跟政府講道理？」佢又話，原來校本管理只係空話，質疑幾個月來教育局都話傾「自願減班」，係唔係有人講大話？
其實呢個政府乜都做得出，類似嘅事日日發生，今次咁啱發生喺林超英身上，畀佢睇清楚呢個政府嘅面目。