政情：林D9求平穩等收工
新年期間大家都鍾意祝人「步步高陞」，希望對方升官發財、更上一層樓，特別係做官嘅，呢句祝福最啱用。但官階已去到D9級嘅政制及內地事務局局長林瑞麟，竟然覺得「步步高陛」唔啱聽，尋日同傳媒聚會時，不斷重申自己「平平穩穩」就得嘞。可能喺呢個現屆政府任期將盡，來屆政府又情況未明嘅時空下，「平平穩穩」唔跌落嚟就已經係最好，喺看守政府做問責官員，要保持民望分數平穩唔跌，一啲都唔容易，睇吓佢身邊嘅同僚就知。
D9曾喺英國修讀法學士，取得大律師資格，回歸後亦出任過律政司政務專員。過去多年嚟，每逢律政司司長，甚至政務司司長職位有空缺，外界都不其然會諗起D9呢位「大後備」，但佢○二年起做政制事務局局長，至今雖然官銜改為政制及內地事務局局長，多年來都冇職升。
只做「恰如其分」工作
D9尋日出席一年一度嘅傳媒聚會時，唔少記者循例祝佢早日更上一層樓，但佢竟然好大反應咁話唔需要，強調自己「平平穩穩」做埋餘下嘅十五個月任期就得喇喎。佢直言，當下星期立法會完成政改本地立法嘅二讀三讀後，嚟緊嘅日子將會係佢工作嘅「落實期」，事關本港回歸十幾年來，都未試過要喺十個月內一口氣舉行特首選委會、特首、立法會及區議會四個大型選舉，加上仲要處理埋《個人資料私隱條例》嘅修訂、港台關係同十二五規劃等大議題，嚟緊將會有排忙，笑言自己只想專注做「恰如其分」嘅事喎。
特首選舉臨近，問到D9未來想跟邊個新老細時，佢更即時耍出「人肉錄音機」嘅功架，播帶話自己無論跟邊個，「都會按照《基本法》同一國兩制嘅本子辦事」。其實林瑞麟就係憑住佢平時平平穩穩被睇好，仕途未必就此止步，做政務司司長或者律政司司長都唔係冇可能，只不過未來形勢未明朗，必須先平平穩穩完成呢個任期。佢嚟緊一輪有咁多嘢做，做到平平衡衡唔跌落嚟，就已經係萬幸嘞。
財政司司長曾俊華日前發表新一份財政預算案，D9畀傳媒影到佢瞌眼瞓，張相其後更被網民瘋狂轉載。D9尋日就展露佢死撐嘅本色，聲言當時只係「靜心聆聽」，並唔係瞓着，仲話同樣不敵睡魔嘅教育局局長孫明揚，只係同佢一齊體現團隊精神喎。咁都畀佢兜到，真係服咗佢。