中環出更：鬧爆預算案 工商界靠自己
財政預算案揭盅之後備受市民批評，卓妮過去兩日聽到唔少政商界名人語帶不滿批評預算案，好似前晚喺馬場見到鐘錶界老行尊嘅工業總會副主席劉展灝（Stanley），佢坦言對預算案一啲都唔失望，事關佢哋工業界完全無期望，自然無失望啦，仲寄語工業界同埋中小企業要靠自己，自求多福好過。
Stanley話，工總年年都喺預算案公布前，向政府反映工業界同中小企嘅意見，希望幫助吓業界發展，但係年年嘅建議都石沉大海，佢明白政府要維持審慎理財嘅原則，但係業界確實好需要幫忙，之不過咁多年來都被冷落，再講都無意思，所以業界都習慣晒靠自己㗎喇！Stanley呢番說話真係講出唔少人嘅心聲，反映財爺鬍鬚曾諮詢無誠意。
孫秉樞：現金落袋最實際
同樣係鐘錶界老行尊嘅孫秉樞都睇唔過眼，尋日去香港會所食飯時話，預算案引起最大爭議係向強積金戶口注入六千元，市民最希望係現金落袋最實際，不過佢都好客氣，話「呢個建議好有創意，睇得好長遠」。
大舊石批加車稅污染空氣
孫秉樞上車離開後，卓妮又遇到專業會議立法會議員石禮謙（大舊石）路過，點知佢鬧得仲激。
大舊石批評，香港好多有需要嘅人都未能受惠於新一份嘅預算案，但佢話鬍鬚曾做得最愚蠢都係建議大幅增加私家車首次登記稅，以為咁樣可以減少市民買車嘅意欲，並減少交通擠塞，但最終只會逼市民用舊車令空氣污染更加嚴重。
卓妮尋日仲遇到自由黨副主席周梁淑怡丈夫、本身係工程師嘅周明權，佢自稱退休人士無乜受惠，問佢點睇預算案，佢就笑笑口話：「財爺年年都畀人鬧㗎啦，好難做㗎！」大家都知財爺個位難做，不過如果真係力有不逮，不如就讓位畀其他人喇。
卓妮