雖然話潮流興保育，之不過咁，萬一官老爺懶懶閒閒，乜鬼嘢保育潮流都係廢嘅啫，事關民間資源有限，好多時候係心有餘而力不足。
呢嗱嗱嗱，上水有一條超過百年歷史嘅客家圍村，叫做松柏塱村，業權人同政府周旋咗三十幾年，竟然仲未達成保育協議，村民狠批古蹟辦毫無誠意。政府態度消極吖嘛，所以部分業權人最近有意重建發展，百年圍村隨時灰飛煙滅。
唉，功夫茶真係唔明，因乜事幹一拖三十年仍然未有共識？三十年喎，足夠時間畀一個幼稚園學生讀完博士課程啦！
早於上世紀八十年代，當時嘅古蹟辦已經認定松柏塱村係「本港現存最完好的客家圍村之一」，又同業權人磋商，建議列為法定古蹟，不過政府當時未有提供經濟誘因，建議被業權人拒絕。時光飛逝，日月如梭，去到二十一世紀嘅二○○七年咯喎，村民主動出擊啦，要求政府協助保育。可惜嘅係官老爺態度依舊消極，其中一名有份參與磋商嘅村民透露，政府嘅反應令人失望，只懂口講保育，實際行動欠奉。
到咗○九年嘞，政府先至研究將客家圍村列為一級歷史建築，不過古蹟辦將渾然一體嘅圍村分拆成四部分，一係民居，二係更樓，三係書室，四係祠堂，打算逐一評級。見到咁荒謬嘅一拆四，村民梗係唔收貨啦，學似前村長黃覺輝話齋，政府唔尊重村民意見：「我哋希望古蹟辦將客家圍村當作一個整體建築看待，唔係將佢一分為四，再分別評級，我哋一定唔會同意！」
點解話一拆四係荒謬？打個譬喻吖，你賣屋梗係成間賣㗎啦，冇可能先賣廁所，再賣廚房、飯廳同客廳。一條圍村分開四部分評級，假如古蹟辦認為祠堂唔夠資格列入保育名單，係咪任得人拆祠堂呢？咪玩啦！
唉，睇怕松柏塱村同何東花園嘅命運差不多，又係唔到最後一刻都唔會得到保育。位處港島半山嘅何東花園，要等到業權人聲稱拆卸重建，政府先至出手，緊急宣布列為暫定古蹟，凍結物業發展。不如咁嘞，松柏塱村照辦煮碗，一於放風話要將古色古香嘅圍村夷為平地，以退為進迫使鈍胎官僚加快手腳做嘢吖嘛。
古蹟辦嘅態度真係消極到冇朋友，根據黃覺輝所講，去年四月已經話要安排古物諮詢委員會實地考察，點知至今連影都未見。黃覺輝又話，古蹟辦曾經三次約定會面時間，但三次都臨時甩底！
唉，好心古蹟辦成班慢吞吞官僚戒一戒龜速辦事嘅作風啦，人生在世冇幾多個三十年㗎咋，一拖再拖好容易拖垮碩果僅存嘅古老圍村。
話時話，經常有人揶揄政府係「假保育」，莫非古蹟辦袞袞諸公傻到以為係讚佢哋「賈寶玉」？係就該煨咯！