政情：發叔冧莊鄉會主席斷纜

屯門鄉委會尋日高票通過修章，訂明鄉委會主席最多只可做兩屆，意味着冧莊幾十年嘅屯門鄉委會主席「新界王」劉皇發，三月尾任期完結後好大機會要同鄉委會主席一職講拜拜。被喻為「倒劉派」嘅現任副主席曾展雄就話，修章唔係針對發叔，而係大家都想鄉委會步向民主化。不過佢不點名批評發叔掌權太耐，改革太少，「好似埃及總統穆巴拉克咁」，先激起民憤，引發倒劉。發叔對此一笑置之，話唔會因為小事唔開心喎。