政情：吳文華續約唔閂後門
立法會早排發出通知公告天下，話秘書長吳文華（Pauline）今年九月尾約滿後將續約一年。尋日情人節都忙得不可開交嘅Pauline話，明年年頭就會公開招聘繼任人，仲寄語下手要做到好似位ＣＥＯ咁；至於佢係咪明年約滿後唔再做，佢又無閂埋後門喎。
Pauline尋日為傳媒簡介增加議員津貼嘅建議，席間被問到續約問題。佢笑笑口自爆今年已經六十歲啦，好高興立法會畀機會佢繼續服務，嚟緊一年會忙於立法會搬竇嘅事，務求做好自己嘅工作。
明年年頭秘書處會透過公開招聘同內部晉升搵新秘書長，Pauline希望搵到有能力又有興趣嘅人接棒，仲話今時今日嘅秘書長唔單止係「程序專家」，睇嘢仲要睇闊啲，好似ＣＥＯ咁，事關立法會有唔少服務提供畀市民。講到咁，莫非佢打算明年唔再續約？Pauline即刻好鬼馬咁話：「咁我又無咁講。」始終唔肯閂後門。