政情：葉劉發炮幫張建宗開年
勞工及福利局局長張建宗一向畀人印象係好好先生，同政黨有偈傾。不過，世事有時唔能夠睇表面，新民黨主席葉劉淑儀尋日提起張建宗，一股火藥味撲鼻而來，直指張建宗嘅「友善」係口惠而實不至。
尋日係情人節，新民黨正、副主席葉劉、田北辰同史泰祖同傳媒新春聚會兼宣布「喜訊」，透露新民黨黨員突破三百大關，新界西辦事處亦快將開幕。
新正頭，葉劉隨即向高官開年，狠批張建宗主推嘅交津新方案刻薄，入息審查當申請人係賊，仲踢爆張建宗曾喺一個酒會上向佢拉票，結果食檸檬收場。葉劉又自爆，四年前從美國學成返港從政，一直邀請張建宗出席講座，聽吓家庭主婦對檢討菲傭政策嘅意見，張建宗次次應承，但例必無影，所以張建宗想佢支持交津新方案，葉劉揚言要「諗過先」，仲寸爆話：「好公平吖，你無幫我，我亦無必要幫你！」