政情：沈祖堯情人節有神秘飯局
尋日係甜甜蜜蜜嘅情人節，本以為中大校長沈祖堯放咗工會趕返屋企同老婆慶祝，點知沈校長尋日喺春茗上爆料，話原本打算同太太共進晚餐，但臨時要出席一個好重要飯局，惟有食完個飯局，再趕返屋企同太太食一個「夜」啲嘅情人節晚餐，到時仲會喺門前花園摘一朵花送畀太太作為情人節禮物。究竟沈校長同邊個飯局，搞到情人節都要放太太飛機呢﹖沈校長就神秘唔肯講。
送禮寫揮春
沈校長尋日趁情人節，祝有情人終成眷屬，仲以印有自己個「嘜頭」嘅祝賀紙仔，加多盒心形朱古力，送畀大家作為情人節禮物。沈校長另外更即席揮毫，親手寫揮春，又送咗一套印有中大校園嘅茶壺和茶杯送畀大家。佢話見到傳訊及公共關係啲同事，就諗起有好多麻煩嘢，令佢聯想起茶煲。佢話希望傳媒夜晚工作飲杯茶嘅時候，會因為諗起中大好好，手下留情。
