政情：為咗嫻姐大輝KK舌戰
下屆立法會新增嘅五個「超級區會」議席，勢成各黨各派嘅兵家必爭之地。一直拒絕出山嘅工聯會重量級人物陳婉嫻，日前高調表明正「積極考慮」復出，更不排除染指超級區會議席。不過，向來喜歡論盡政壇人物嘅廠商會立法會議員林大輝，尋日就暗嘲嫻姐有如「博物館入面嘅舊嘢」，揚言工聯會唔應該一味搵舊人出山，應該製造多啲機會畀後輩至得喎。
政改本地立法嘅草案已完成逐條審議階段，各黨派陸續提出各項修訂，大家各取所需，務求令黨友包攬最多議席，其中工聯會就建議港府將五個超級區會議席嘅門檻放寬，讓前任民選區議員都有得落場跑，擺明車馬為嫻姐鋪路參選。大輝尋日見傳媒時，就批評工聯會呢項修訂冇理據，只為自己度身訂造，講明一定唔會贊成。講得興起，佢仲暗寸工聯會唔應該成日喺博物館搵舊嘢，事關香港需要新血，應該畀多啲機會後生仔至係，佢言下嘅「博物館文物」，不期然令人聯想起近月高調曝光盛傳出山嘅嫻姐。
面對大輝嘅冷嘲熱諷，工聯會議員黃國健（ＫＫ）尋日就出言相助，為嫻姐解圍。佢反駁話，博物館入面所有嘢都係寶物，仲話香港所有政治人才，都係經長期磨練，經歷風風雨雨先鍛煉出嚟。黃國健又大讚嫻姐係本港公認有分量嘅政治領袖，絕對唔係博物館入面嘅舊嘢，總之同大輝撐到行。
為C18會員造勢 唔封直選後路
講開選舉，去年發起地區組織「C18」嘅大輝，坦言組織內大部分成員都會出戰年尾嘅區選，但相信佢哋對超級議席無興趣，未來數月佢亦會親自出席C18成員搞嘅一系列春茗活動，幫佢哋造勢。咁佢自己明年有冇興趣落場玩立法會直選、同嫻姐鍊過呢？對呢個問題大輝都係嗰句：「除非廠商會唔要我，否則我唔會走直選呢條路。」不過佢無封後路，話自己任何時候都做緊地區工作，即使最後焗住玩直選，都唔擔心會唔夠時間。當然，如果大輝想爭超級區議會議席，今年就要選區議會，結果好快就會揭盅。