中環耳目：鄭明明星洲「撈起」賀年
各處鄉村各處例。喺新加坡過新年，主角唔係年糕，而係「魚生撈起」，寓意「風生水起」、「愈撈愈旺」之意。「美容教主」鄭明明與「零食天王」戴德豐太太戴胡美蓉農曆新年巧遇在星洲，齊食「撈起」迎好運。
明明姐大年初一同老公抵達星洲，入住人氣急升嘅濱海灣金沙酒店，咁啱得咁蹺，成班香港名人都揀呢度度假，包括大美人林青霞、東區區議會主席丁毓珠、香港婦協主席林貝聿嘉，仲有戴胡美蓉添，夾都無咁蹺。
他鄉遇故知，分外投契。明明姐拉埋戴太品嘗著名星洲賀年美食──「魚生撈起」。到底係乜東東？材料包括魚生（多為三文魚）、水果絲、紅蘿蔔絲、薑絲及花生碎等；醬料就以酸梅汁為主。品嘗前，大家要用筷子將盤內材料高高夾起，一邊用廣東話講：「撈起！撈起！」，攞番個好意頭。
遊完星洲，明明姐三月將以全國政協委員身份上京開兩會。「中國女電王」李小琳搵埋佢喺全國婦聯搞嘅三八婦女節晚宴上表演拉丁舞，聽聞李小琳呢排秘密練兵，老師仲奪過英國黑池嘅拉丁舞冠軍添。