中環出更：中出酒會新生代紛現身
中華出入口商會（簡稱「中出」）尋日舉行新春酒會，已故中出立法會議員許長青嘅囝囝許華傑、和富社企主席李宗德嘅大女李美辰（Christina）、時代裘皮動物董事總經理單志明嘅囝囝單曉斌（Andy）等年輕人都齊齊現身，佢哋都係中出嘅新生代，Christina仲係中出青年部主任。李宗德盛讚愛女做得好，做爸爸嘅百分百支持佢瞓身為社會服務。
尋日中出會所人頭湧湧，出席嘅嘉賓逼到水洩不通。中聯辦副主任黎桂康、商務及經濟發展局局長劉吳惠蘭、運輸及房屋局副局長邱誠武、全國政協常委陳永棋、中華總商會榮譽會長霍震寰等政商名人齊撐場。會長莊成鑫同一眾副會長忙於迎賓，加上尋日係情人節，現場溫馨同喜氣話題齊來，零舍熱鬧。
李宗德讚愛女魄力夠
身形嬌小嘅Christina一早嚟到，佢係中出常務會董兼青年部主任，又係寧波市政協委員，公職唔少，難得爸爸李宗德倒背如流，愛女之情溢於言表。佢仲讚阿女唔簡單，事關囡囡Christina有三個年幼子女，仲喺家族企業和富塑化集團幫手，冇咁上下魄力點頂得住？
年年大派通勝嘅港九罐頭洋酒伙食行商會副理事長李廣林，尋日都喺現場派通勝，卓妮見Andy好開心咁捧住本通勝，猛話佢哋做皮草生意最緊要睇通勝，咁仲未夠，仲要睇埋米曆。
大家好少聽講米曆，事關本書唔係好普遍，要搵米商至有，佢話呢兩本書有助於掌握氣候變化，如果天氣凍咪可以訂多啲皮草囉。不過近年全球氣候反常，除咗參考老祖宗嘅智慧，都唔可以忘記現實情況，所以Andy仲要參考近三十年嘅天氣比較圖添！睇嚟後生仔做生意都好講究喎！