中環出更：保良東華團拜三太四太齊缺席
情人節，甜蜜蜜。兩大慈善團體「保良局」及「東華三院」，尋日不約而同揀呢個溫馨日子搞新春團拜，仲咁蹺揀正早上吉時拜神，原來大家都鍾情呢個好時辰。不過，保良總理、賭王四太梁安琪與東華副主席、三太陳婉珍呢兩個近期熱辣辣嘅焦點人物，尋日卻雙雙缺席。四太人唔到，但利是照派可也。
天文台話，尋日係數十年來最凍嘅情人節。寒風刺骨，無損團拜熱情。保良主席呂鈞堯（Quincy）率領副主席龐盧淑燕、莎莎老闆娘兼總理郭羅桂珍、陳正欣總理及林潞總理，喺總壇互相恭賀。
娶咗韓國太太嘅Quincy今年首次派利是，心情靚爆，佢靜雞雞同卓妮講，希望早生貴子。想「造人」成功，梗係要冧掂太太喇。尋晚情人節，Quincy book定蘭桂坊餐廳陪嬌妻歎燭光晚餐，sweet到極！
龐太就選擇與眾同樂，約埋六pair夫妻齊歎杭州菜。佢同老公結婚四十幾年，默契盡在不言中，唔使互送禮物，一樣咁恩愛。龐太嚟緊將接任保良主席寶座，佢笑言呢排已緊張到瞓唔着。
梁定宇難忘東華團拜派利是
一身貴氣Fendi皮草嘅郭太啱啱由拉斯維加斯度歲返港，佢自爆同老公喺賭場發咗少少新年財，數目就唔講嘞。講到情人節，郭太甜絲絲話：「一陣返寫字樓，一定循例有花收嘅。」郭太靚衫、珠寶不缺，老公送乜禮物唔重要，最恨反而係盡快抱孫喎。
另一邊廂，東華主席梁定宇（Billy）與副主席陳文綺慧、施榮恒及總理李鋈麟等人喺東華總部團拜。佳節當前，Billy約咗太太喺屋企撐枱腳，唔使同人逼。卸任在即，問佢有乜難忘事，Billy搞笑話：「東華團拜派利是！我未試過一日內派咁多利是，好開心。」
卓妮