咦咦咦，港鐵忽然多咗一個花名，叫做「三不機構」。立法會議員黃成智話喎，港鐵已經變成不負責任、不能信賴以及不再安全，要求向乘客賠償，並且停止向行政總裁周松崗等等管理層派發花紅。
赤口都過咗啦，因乜事幹激到尊貴議員咁猛火氣呢？原來呢間三不機構又出事，尋日早上繁忙時間喎，港鐵金鐘站往尖沙咀方向路軌出現裂紋，列車服務受到阻延，由平時每兩分多鐘一班，改為三至三分半鐘一班。列車固然少咗，車速亦係慢咗，好多乘客受累於龜行蝸步，結果返工遲大到，被迫向老闆低聲下氣道歉。
其實今次已經係港鐵三個星期之內第二次發生路軌爆裂，上次係欣澳站往東涌方向一段路軌出事。你知啦，路軌出現裂紋可大可小㗎，一個唔覺意導致列車出軌，咁就真係喊得一句句！
所以好難怪身為民意代表嘅議員咁扯火，狠批港鐵大股東特區政府一再縱容，令人擔心安全水平不斷下降。
機電署發言人話喎，非常關注今次事故，已經即時向港鐵了解情況，亦派員視察更換路軌，並且會跟進調查工作，防止同類事件再發生。
計功夫茶話齋，不如搵人直接跟進周松崗好過啦，睇下呢條友仔到底有冇決心改善服務質素，事關港鐵的而且確不負責任、不能信賴以及不再安全。最令功夫茶火滾嘅係，要求港鐵站加裝月台幕門講咗Ｎ咁多年，呢間三不機構居然拖得就拖，拖到唔知再要死幾多人先至完工。
呢嗱嗱嗱，早兩日之嘛，遲遲未安裝幕門嘅葵興站又變成危險陷阱，一位二十七歲男子候車期間不適暈倒，由月台一嘢跌咗落路軌。好彩有乘客見到即刻高聲呼叫咋，又好彩月台職員立即通知車長，更加好彩嘅係列車夠時間緊急停車，否則後果不堪設想。
又好似觀塘站咁吖，同樣係因為未有月台幕門而恐怖到極，日前有一名四十八歲女子突然跳落路軌企圖自殺，如果列車早少少埋站，到場救人嘅消防員都救唔切啦。
至於其他慘痛例子咯喎，請恕功夫茶唔係過目不忘嘅記憶力超人，事關實在太多太多嘞，多到記都記唔晒。總而言之，港鐵月台不設防，死傷枕藉陸續來！
話時話，點先至可以迫使港鐵戒除三不陋習？最正路嘅辦法當然由港鐵嘅大股東出手嚴懲，莫講話管理層唔准派發花紅，甚至乎有必要減薪重罰，直至服務質素有所改善為止。
萬一政府繼續包庇縱容，仲有一個不太正路嘅辦法，就係搵一啲俠膽仁心嘅死士，夾手夾腳捉實周松崗，逼佢喺冇幕門嘅月台近距離感受一下列車風馳電掣駛來駛去嘅驚險場面。記住，真係要近距離接觸，譬如話接近墮軌邊緣只有一厘米左右，等周總裁嚇到馬上加快安裝幕門吖嘛。
總而言之，麻煩三不機構唔好再草菅人命！