政情：張國鈞為啖氣拒置業
樓市狂升，依家應唔應該入市，係每個無殼蝸牛嘅頭痛問題，一年幾前「升呢」做律師行合夥人嘅民建聯副主席張國鈞就無呢個煩惱嘞，因為佢立定心志，樓價唔跌唔買樓。張國鈞甘做無殼蝸牛，原來為啖氣。
「就見頂唔甘心入市」
張國鈞大學畢業後開始租樓住，幾年前搬入杏花邨，上年二月結婚，細屋搬大屋，搬入隔籬座一個近八百呎單位，月租二萬蚊，同任職投資銀行嘅太太共築愛巢。公屋夫妻為開門七件事頭痕，張國鈞同太太肯定屬中產一族，一樣有為置業問題鬧分歧，太太覺得依家唔買，遲啲仲貴，但張國鈞堅持唔制，事關○九年樓價飆升時，佢睇死樓價必定跌番落嚟，點知樓價一路愈升愈有，佢就咬碎銀牙都忍住唔入市，「依家就嚟見頂嘞，先至入市？真係好唔甘心！」
張國鈞認為樓市見頂，相信呢個係所有無殼蝸牛嘅願望，但好多人都唔信會願望成真，張國鈞為啖氣，隨時要捱多幾年貴租喎。