政情：嫻姐出山搵譚香文祭旗

彭清華叫保重身體

自從舊年政改方案通過後，嫻姐一直係參選超級區議會議席嘅熱門之一，不過佢近年過住半退休生活，所以一直冇諗過重出江湖。不過盛情難卻，據講除咗工聯會兄弟姊妹之外，就連街坊都不斷叫佢復出，難怪搞到佢心思思。棠哥尋日話，工聯會立法會選舉策略係由一個風車軸心，帶領五個地方選區直選，佢仲話尋日同中聯辦拜年時，主任彭清華特登叫嫻姐保重身體，聽到呢度大家即時明晒。

嫻姐重新披甲，首要係搵啱選區，參加今年年底嘅區議會選舉。嫻姐嘅發迹地係以前嘅九龍中選區，即係黃大仙、慈雲山同橫頭磡一帶，地區人士講，呢一帶有工聯會背景嘅區議員一直支持嫻姐出山，如果嫻姐要出選，唔少人都會玉成好事。

黃大仙區議會裏面，有機會讓位畀阿姐嘅唔少，包括林文輝、何漢文、李德康、何賢輝、莫健榮同蔡六乘，其中多數仍然係當打之年，相信嫻姐亦唔會要佢哋讓位。據悉，嫻姐去莫健榮嘅彩虹選區或者蔡六乘嘅龍星選區機會較大。

蔡六乘○七年喺龍星區擊退咗前立法會議員譚香文，譚香文一直有意捲土重來，不過如果對手係嫻姐，相信譚香文都凶多吉少。對嫻姐而言，對手係譚香文嘅話，象徵意義亦大於一切，話晒都係前公民黨立法會議員喎，搵佢祭旗都咪話唔過癮！

棠哥未決定做手術

棠哥尋日提到，工聯會會員已經去到三十五萬七千人，今年區議會選舉會派四十幾人、喺全港十八區裏面嘅至少十五個區出選。佢尋日亦有交代身體狀況，承認因為頸椎問題，一直向工聯會同行政會議請假，所以先會缺席幾次行會會議，佢依家仲考慮緊做唔做手術，由於有風險，要同家人商量先再決定。