中環出更：方剛捱貴租焗遣散員工
工商舖樓價同租金狂升，貴租好難捱。喺立法會代表批發零售界嘅自由黨副主席方剛，旗下著名時裝品牌Episode喺中環娛樂行嘅旗艦店，最近都因為業主大幅加租，而被迫搬遷改做樓上舖，令佢深感無奈同唔捨得。
方剛尋日向傳媒訴苦，話零售業生意點好都追唔上租金升幅。佢自爆自九三年租落、佔地近萬呎嘅Episode中環旗艦店，喺三年前簽落嘅租約仲係月租約一百三十萬元，到最近租約期滿，竟然一加就加到二百幾萬元，升幅高達七至八成。
貴租難頂，佢惟有改租喺同一座大廈嘅高層寫字樓單位，轉做VIP樓上店，希望起碼可以留住啲熟客仔，喺咁嘅情況下，佢唔排除有部分人要被迫遣散，過完年冇耐就面臨失業。
唔怪業主怪政府
方剛強調唔會怪責業主大幅加租，因為個舖位真係有價有市，對方只係在商言商，佢反而炮轟港府死抱所謂嘅「積極不干預」同高地價政策，一眾高官為避免畀人質疑「官商勾結、利益輸送」，唔肯推出措施支援工商界，令香港營商環境愈嚟愈差。
卓妮