中環出更：越南過貓年蔡冠深懵然
兔年新春團拜接踵而來，行政會議都趁尋日每月一度嘅Thursday Lunch大搞開年飯，嘉賓有中華總商會會長蔡冠深、恒隆集團主席陳啟宗、房協主席楊家聲、前教統局局長李國章等，但行會成員就只係見到召集人梁振英、成員楊敏德及發展局局長林鄭月娥。蔡冠深啱啱去完越南巡廠返港，佢喺當地做生意多年，但原來唔知越南今年係貓年。
蔡冠深嘅生意瓣數多多，越南都有開設廠房，每年農曆新年例必過去巡廠兼同工友食開年飯，今年就喺年初五過去，尋日早上回港後隨即出席行會午宴。蔡冠深話，越南好有中國傳統節日色彩，街道上放滿晒鮮花，好似維園年宵咁，新春氣氛相當濃厚。不過，對於越南今年係「貓年」，蔡冠深就話無留意，唔講仲以為同中國十二生肖一樣，今年輪到兔年喎！
至於點解係貓年，有一個講法話係因為今年「辛卯」年嘅卯字嘅越南讀音同貓字相似，為咗迎接貓年，據聞越南首都河內嘅街頭會舉行貓咪選美，市場亦有售賣幼貓嘅攤檔，畀民眾買隻貓返屋企過新年。
林鄭唔知誰是菜園村善長
卓妮又同林鄭月娥傾幾句，講開佢喺年初一、二落區搞親民騷，佢笑笑口話：「雖然兩日都走出街，但唔使返工都幾Relax（輕鬆）嘅！」林鄭同鄉議局主席劉皇發經常有工作往來，問佢知唔知捐錢幫菜園村買路權嘅善長係邊個，林鄭話：「我唔知呀，你問發叔啦！」佢臨走前仲祝大家身體健康。
卓妮