中環出更：潮人新春團拜勁擦家鄉甜品
新春期間，各式甜品糕點極度誘惑，雖然對健康未必好，但好多人都難以抗拒。尋日潮州商會舉行新春團拜，卓妮同香港防癌會主席高永文傾起至愛嘅賀年食品，佢勁讚潮州特色綠豆糕清甜唔膩，係潮州食品嘅一絕！不過，佢至愛都係潮州柑，仲左手拎住個柑、右手大啖綠豆糕，童心未泯個樣勁搞笑。
尋日潮州商會搞新春團拜，過百潮人扶老攜幼互道恭喜。潮州商會會長陳幼南同爸爸陳偉南一早到場迎接鄉親，九十幾歲嘅國學大師饒宗頤都現身，佢睇嚟精神爽利，一入場大家就拍爛手掌歡迎佢。潮商永遠名譽會長莊學山、中投國際（香港）主席劉遵義、潮屬社團總會名譽會長高佩璇等人都喺度。香港有過百萬潮人，難怪尋日場面咁墟冚。
劉文文拒證實加煙稅
商會準備咗潮式餅糖糕點名店「貴嶼仔」嘅出品招呼大家，又有靚靚嘅潮州柑。高永文好鬼馬咁推銷家鄉美食，話佢至愛潮州椪柑，不過鄉下有種「蕉柑」仲好味，可惜香港冇得賣。仲話下星期佢返內地開會，到時要買一大箱返嚟，唔知會唔會大派街坊呢？
最近盛傳政府打算大加煙稅四成，卓妮見到吸煙與健康委員會主席劉文文，佢賣關子唔肯證實，但佢嘅新年願望係「無煙香港」，各位煙民做好心理準備喇！
卓妮趕場去佐敦參加九龍各界新春團拜，見到福建幫頭領、全國政協常委楊孫西，佢話大家大魚大肉食得多，要飲吓靚茶消滯。
本身做茶葉生意嘅佢到處尋訪靚茶，佢呢期極力推介湖南黑茶，笑言男士飲咗可以消除肚腩，女士飲咗青春常駐、身材好，聽到卓妮都心思思。
卓妮