政情：蘇樺偉陳冬梅繪夢想跑鞋

由香港業餘田徑總會與渣打銀行全力策動嘅「馬拉松101教育計劃」，早前邀請逾五千名中小學生，為千八隻巨型跑鞋鞋模設計造型，殘奧會金牌得主蘇樺偉同陳冬梅都攞起畫筆，畫埋一份。

樺偉謙稱唔擅長設計，構思圖案頗費神，最後敲定用殘奧標誌及跑道為主題，花咗三天時間，為巨型鞋模塗上繽紛色彩。

繪畫多年嘅陳冬梅對畫鞋駕輕就熟，雖然要以腳代手執筆，冬梅嫌畫一隻未夠喉，要求畫夠一對。

佢以大自然為主題，為鞋模繪上綠草、藍天，又加上lace鞋帶，感覺清新。冬梅話，畫夠一對鞋模，寓意一男一女，喺人生路上互相扶持。

講到2011年大計，樺偉戰意高昂，笑言有信心取得倫敦殘奧入場券。冬梅就計劃開個人畫展，又希望到廣西做義工喎。