政情：陳家強夫婦電話維繫親子情
香港人工作繁忙，親子時間愈嚟愈少，不過財經事務及庫務局局長陳家強完全冇呢個問題。佢兩位公子依家喺美國住，而佢任職摩根士丹利高層嘅太太胡翠萍，日日同囝囝通電話，佢自己都一星期同阿仔傾一次偈。佢哋兩公婆一個係高官，一個係投行高層，平時咁忙，但親子工夫做到足。
掌握囝囝作息時間
陳家強話，大仔依家喺美國工作，細仔就讀緊芝加哥大學三年級，同陳家強一樣，都係讀Finance。
太太同兩個仔嘅關係一向好好，但要做到日日通電話都唔易，秘訣係掌握晒阿仔嘅作息時間，夾定佢哋日日最得閒嘅時間打電話畀佢哋。所以話，父母同子女嘅關係疏離定親近，同付出嘅努力息息相關。
講起芝加哥大學，陳家四口都係芝大校友，而且都係讀Finance，成為一時佳話。記得○七年底芝大香港舊生會聚會，當時細仔啱啱獲芝大取錄，眨吓眼細仔已經讀三年級，最近為咗搵投行做暑期工，聖誕節啱啱飛返香港見工，跟住又要去紐約見多次工，都幾頻撲。