政情：政府搞BBQ討好建制派
以前泛民成日話行政立法關係惡劣，但依家就到建制派琅琅上口，事關過去一年港府好唔識做，先有政改臨時轉軚，後有堆填區廢法當立法會冇到，啱啱再嚟多單報細數嘅強推申亞，搞到成班建制派冇晒癮。煲呔曾知衰，尋日喺粉嶺別墅搞BBQ宴請建制派議員，捉埋有份放火嘅政制及內地事務局局長林瑞麟同民政事務局局長曾德成向大家「耍冧」，事關政改本地立法又殺到嚟，有望建制派繼續支持。雖然大部分議員畀面出席，可惜天寒地凍，議員喺山邊吹到變雪條，加上菜式麻麻，呢餐和頭酒睇嚟冇乜作為。
呢個BBQ團之前不獲好評，唔少人都話寧願落區都唔去。不過尋日民建聯、工聯會、經濟動力、專業會議同五散人大部分成員都有去BBQ，計埋有廿幾三十人，加埋特首辦職員都坐足四圍，算係有人氣。有出席嘅議員話，雖然煲呔曾搵咗幾個暖爐出嚟，但唔少人仍然凍到手震，好在有曾太炮製熱豆腐花畀大家暖吓胃。