政情：莎姐抱狗遊行谷新人
區議會選舉將至，唔少疑似參選人都趁呢段時間搞活動爭取曝光。尋日自由黨同退出自由黨冇幾耐嘅方國珊（哪吒）就分頭搞活動，方國珊搞咗個團年夜飯同班街坊聚一聚；自由黨就搞咗個「愛心狗狗山頂行」，聯同三、四十個愛狗之人，拉住廿幾隻狗仔遊行，抗議警方辦事不力，至今仲未捉到半山毒狗案嘅犯人。
哪吒拒做「剩女」想埋堆
先講自由黨，兩位副主席周梁淑怡（莎姐）同方剛都有出席，無他嘅，完全係為谷新人上位，佢就係自由黨區議會山頂選區疑似候選人陳浩濂。尋日見莎姐相當興奮，原來佢都係愛狗之人，養過四隻狗，以前由兩個女負責照顧，不過囡囡相繼出嫁後，連狗仔都嫁埋過去喇。莎姐話，養狗對小朋友有好處，因為可以等佢哋愛惜生命。
哪吒尋日就喺將軍澳新都城筵開十一圍，同班街坊食團年飯，佢契媽張人龍太太同契爺胡楓都有去撐場。哪吒講笑話，新年願望係唔做「政壇剩女」喎，即係唔排除會埋堆加入其他政黨或政團。睇到呢度，唔知各大政黨會唔會即時向呢位剩女招手呢？