政情：孤寒財爺拒放水紓困

鬍鬚曾尋朝一早現身香港基督教青年會，全程看似有氣無神嘅佢，致辭時照稿宣讀話，無論做預算案定係做領袖，都必須具備溝通、社會承擔同務實三點。佢借用英國前首相邱吉爾嘅名言話，「站起來說話要有勇氣，坐低聆聽也需要勇氣」。聽落去頭頭是道，但轉頭隨即露出原形。佢話做事不能因為有啲人大聲疾呼，或者為博取一時掌聲而做。潛台詞似乎係無論民意訴求幾咁強烈，亦唔代表佢會接受。

跟住佢打蛇隨棍上，講明唔認同有盈餘就要派糖，只承諾「有需要時要做啲短暫性、針對性嘅紓困措施」。換言之即係庫房水浸都唔肯攞番啲出嚟紓困，仲死撐對派糖反感，自誇係「應使則使、善用公帑」。

畀學生寸何謂「善用」

不過話口未完，現場一位男同學隨即寸爆鬍鬚曾話，除咗說話同聆聽要勇氣外，「聽完之後去真心消化都需要勇氣」，鬍鬚曾聽完頓時面色一沉。男同學繼續發功，話唔同界別嘅人都反映通脹升溫，要求鬍鬚曾解決，最後仲質問鬍鬚曾，早前有市民喺諮詢活動上遞咗舊苦瓜畀佢，點知佢叫人哋攞番屋企煮嚟食，到底係咩意思？緊隨其後嘅一位女同學則換個角度，追問鬍鬚曾成日以「善用盈餘」呢啲咁中性、好聽嘅字眼講嘢，咁究竟何謂「善用」呢？

面對同學們嘅連珠炮發，鬍鬚曾顯得招架唔住，除咗迴避苦瓜問題外，仲即時耍官腔話，所謂善用即是令開支針對性咁幫到有需要嘅人，講咗等於無講。至於全城關注嘅通脹問題，鬍鬚曾不得不正面回應，佢話舊年通脹比起經濟增長來講尚算溫和，但不得不承認來年會加劇，令低收入人士生活大受影響。其實受通脹影響嘅，又何止係低收入人士；若然鬍鬚曾繼續攬住個荷包唔放，肯定又會激發民怨，唔知佢又有冇勇氣放水紓民解困呢？