中環出更：湯修齊歎羊腩煲暖胃驅寒
近排寒風刺骨，暖笠笠嘅羊肉煲係唔少老饕嘅驅寒首選，博愛醫院候任主席湯修齊（Henry）原來都係羊肉嘅忠實擁躉。早前卓妮喺尖東幸福中心二樓華星酒家食午飯，見到Henry夫婦同朋友喺度歎全羊宴，成班朋友一邊食嘢一邊為籌款度橋，為佢今年四月走馬上任未雨綢繆。
度橋改變籌款模式
Henry同卓妮講，慈善團體嘅籌款競爭愈嚟愈大，佢哋嘅籌款模式都要求改變，以吸引多啲後生仔同善長仁翁嘅注意。佢度緊好多新穎好橋，例如號召過千人齊做某種運動寫入健力士紀錄，卓妮聽落都覺得有意思，相信到時可以令人耳目一新。
當日城巴兼新巴企業傳訊副總監陳燕玲（Elaine）、半山區扶輪社社長兼香港殘奧馬術代表葉少康（Nelson）都喺度。Elaine話，做善事最開心，搞籌款活動最緊要畀市民睇到，將來大家會多啲喺佢哋嘅巴士車身見到博愛活動喇！Nelson近年推動以科技支持復康運動，同博愛有好多合作空間，難怪當日同Henry咁好傾。
講番當日食到眾人讚口不絕嘅全羊宴，華星老闆關南話，佢哋三年前引入廣州全羊宴後，反應相當好，原來香港人都好接受呢種口味。佢哋揀選海南知名嘅東山羊炮製，每隻約重二、三十斤，經典菜式包括白切東山羊片、撈金錢羊肚絲、椒鹽羊肋排同Henry至愛嘅羊腩煲等，深受食家歡迎，每席盛惠一千六百八十元。
華星嘅羊肉有鮮味冇羶味，秘訣係用竹蔗茅根同馬蹄辟味，每道餸必用新疆上等香料孜然粉去膩吊味，難怪食到大家舔舔脷。除咗全羊宴之外，佢哋嘅羊腩煲都係鎮店之寶，Henry就係超級粉絲。
肥瘦均勻鮮而不羶
Henry間公司就喺幸福中心，華星理所當然成為佢嘅私人飯堂。佢嘅爸爸係香港道教聯合會兼圓玄學院主席湯偉奇，佢話以前爸爸好鍾意食羊腩煲，佢自細跟住食就愛上咗。Henry盛讚華星嘅羊腩煲肥瘦均勻，好腍冇羶味，係推介首選！關老闆有咁識欣賞嘅知音朋友，難怪近年都受Henry感染，支持博愛籌款。
卓妮