政情：陳新滋年捐一成人工撐浸大
浸大尋日舉行感恩茶敍，頒贈基金證書畀熱心嘅捐贈者同宣布新一年籌款計劃。喺眾多善長仁翁之中，以浸大校長陳新滋最受矚目，事關佢捐咗五十五萬元畀浸大，陳校長仲承諾每年會至少捐出佢份人工嘅十分之一添！
陳校長去年七月先至到浸大履新，約半年時間就捐咁多錢，可見佢對浸大幾有感情。
浸大發展事務處總監鄭陳惠蘭爆料話，校長又承諾每年捐出人工嘅十分之一畀學校，不過我哋問番陳校長，佢好爽快咁話，應該唔止十分之一喎。
浸大校董會主席王英偉都喺度，我哋梗係第一時間恭喜呢個星爸，事關佢嘅歌手囝囝王梓軒去年大豐收，橫掃五個歌唱大獎。
王英偉變樂壇大贏家
其實王英偉為囝囝開埋唱片公司撐佢，身為爸爸兼老闆，佢至係大贏家。講起囝囝，王英偉喜上眉梢，仲話以囝囝嘅實力，將來實可以喺亞洲樂壇佔一席位。
講起浸大發展，去年佢哋喺全球排名已進步至第一百一十一位，又成功籌到一億四千幾萬元，成績唔錯。不過王英偉尋日對住班學校高層放話，如果大家努力將排名推進至一百名以內，佢自掏腰包請食飯。今年佢哋嘅籌款目標係一億五千五百萬元，還望各方善長多啲支持喎！