中環出更：哥頓太臨出門訂花過年
眨吓眼又快過年，提早辦年貨有着數。合和實業主席「哥頓」胡應湘太太胡郭秀萍呢排四出揀年花，胡太最愛氣質高雅嘅水仙；人見人愛嘅桃花，就只會買來點綴寫字樓。胡太仲透露一個小秘密，佢屋企向來唔插桃花。莫非囝囝胡文新已經太旺桃花?!
陪老公赴美開校董會
天口凍，胡太尋日現身香港會食晏，急不及待出動豹紋皮草，感覺暖笠笠。胡太預告日內起程去美國，陪老公出席普林斯頓大學校董會會議。何解山長水遠去開會？原來哥頓一家同該校淵源深，哥頓自己讀該校土木工程系；公子胡文新就係機械工程系畢業生，兩父子都係普林斯頓出品，難怪哥頓喺九六年一口氣捐一億美元撐母校，依家仲做埋校董會成員添。
臨出門前，精明嘅胡太預先辦好年貨，買齊賀年食品，仲走去預訂年花。不過咁早買花，唔怕未過年已凋謝咩？胡太笑騎騎話：「我揀好花，落咗訂先，返到香港先叫人送貨。」聽胡太嘅口氣，似乎對揀年花好有心得，下次去訂花，記得叫埋卓妮喎！
卓妮