考大家一句成語，巧取豪奪點解？根據詞典，巧取豪奪即係用巧妙嘅手段騙取，或倚仗權勢強行奪取咁解。好喇，講完成語講番現實。近日爛果報大肆報道，聲稱有人巧取豪奪，重建大宅獲當局「放水」，批准發水超過一倍喎。唉，唔知嘅畀佢嚇死，知嘅畀佢笑死。
件事係咁嘅，長和系主席李嘉誠重建位於深水灣道七十九號大宅，剛獲批出入伙紙，爛果報就添油加醋，生安白造，話大宅獲贈近萬呎樓面，仲假借網民及聽眾嘅所謂意見，話屋宇署放水太明顯呀、政府優待富豪呀、有人巧取豪奪呀，真係語不驚人死不休。
事實係點？事實係李家新大宅可住樓面只有九千幾呎，所謂獲贈近萬呎樓面，根本就係子虛烏有；仲有吖，發水又好、豁免又好，其實絕大部分係將露天車位變成有蓋車位，而且已向政府補地價五千四百幾萬元，咁點算贈送吖又。睇嚟爛果報真係愈來愈九唔搭八，除咗唔知醜字點寫，連巧取豪奪咁簡單嘅成語都唔知點解。
有人話，爛果報嘅報道完全係一個笑話。其實類似笑話早就見怪不怪咯，咁多年來，爛果報惡意針對李先生，負面報道數都數唔晒，甚至連李先生獲國家領導人接見都可以攞嚟大做文章，大字標題話「李嘉誠惡晒」，真係無聊到極。
講到尾，皆因酸葡萄心理作怪。呢，人哋長和系不屑與淫賤黎呢種契弟為伍，拒絕喺誨淫誨盜、反中亂港嘅爛果報落廣告，佢就發晒爛渣，一時玩抹黑，一時玩唱衰，一時煽風點火，一時死纏爛打，好似烏蠅咁，煩不勝煩，又好似曱甴咁，拍極都唔死。
正所謂，來說是非者，便是是非人。如果講到獲政府優待，淫賤黎認第二，絕對冇人敢認第一。嗱，壹淫媒宣淫販賤，違反《淫褻及不雅物品管制條例》已經過百次，但次次都獲當局輕輕放過，罰款多者數萬，少者數千，不痛不癢，咁點止係放水，直情係放生喇。事實證明，真正巧取豪奪嘅唔係第二個，而係淫賤黎，佢有口話人，冇口話自己，夠晒厚顏及無恥。孟子話齋，「無羞惡之心，非人也」，淫賤黎自認契弟，確實有自知之明。
唉，國家將亡，必有妖孽，壹淫媒唯恐天下不亂，成日妖言惑眾，搞風搞雨，煽動仇富仇商情緒，唔怪得香港愈來愈烏煙瘴氣喇。講起仇富仇商，香港開埠百幾年，大家安分守己，各自努力，各自搵食，從來冇仇富仇商呢回事，但自從壹淫媒出現之後就乜都變晒，家陣是非顛倒，黑白混淆，成個社會亂七八糟。歸根究柢，壹淫媒先至係仇富仇商情緒嘅始作俑者，先至係深層次矛盾嘅罪魁禍首。
計功夫茶話齋，慶父不死，魯難未已；淫媒不除，香港永無寧日！