政情：單日堅死撐冇優待Amina

三度襲警罪成、正在大欖女懲教所服刑嘅Amina，又被指享有特權，今次係質疑佢嘅父母用盡每月兩次探監機會後，再獲准額外探監機會。懲教署署長單日堅尋日現身一個活動時澄清，強調署方乃一視同仁，言下之意無優待Amina。佢搬埋數字出嚟，話由去年中到年尾，署方共收到約六十宗要求額外探監嘅申請，當中九成獲批；佢話，若然呢啲係特權，咁九成人享有咁嘅特權。Amina案係惹火議題，難怪單日堅要即時出嚟撲火，否則分分鐘燒埋身。