政情：沈祖堯嘆國人欠修養
新年伊始，好多人都會趁機會檢討自己過去嘅表現，希望以後做得更好。中大校長沈祖堯前日發表網誌，本身係醫學專家嘅佢都趁新年之際把脈一番，不過今次唔係醫香港人，而係醫內地同胞，希望「強國人民」喺發展經濟同時，都要注重自身修養嘅人文質素，做一個真正令人羨慕嘅大國公民。
沈校長透露，自己爸爸係上海人，四九年內地解放後到咗香港定居，父母八十年代初帶埋佢同細佬兩兄弟回鄉探親，記憶之中，當時上海舊樓林立，而由上海去杭州、蘇州同無錫嘅火車更加得人驚，隨地都係痰同垃圾，車內空氣令人完全唔想呼吸。
沈校長去年暑假故地重遊去上海睇世博，驚訝當地發展驚人，我國亦變成世界上最有錢嘅國家，不過街道上、商店裏面仍然有爭先恐後嘅場面，一般居民嘅禮貌仍然有待改善。佢慨嘆，內地物質氾濫，有時令金錢比內在修養更重要。佢期望三十年後，當個女帶佢重遊上海嘅時候，可以真正見到泱泱大國人民應有嘅羨慕同情懷。沈校長呢番說話，確實發人深省！