政情：KK拆禮物日抱孫女
聖誕節係收禮物嘅日子，港區全國政協委員、金城營造主席王國強（KK）喺Boxing day就收到上天送畀佢嘅一份大禮，佢第一個孫女喺廿六日出咗世，女娃娃重六磅幾。恭喜，恭喜！由於KK八十八歲嘅爸爸「輝叔」王錦輝仍然在堂，王家四代同堂，可喜可賀。
KK上個月喜事重重，先係獲浸會大學頒授社會科學博士銜，再獲香港工程師學會選為全港二十三名最著名工程師之一，同諾貝爾物理學獎得主高錕等人同列香港「工程界翹楚」，依家大新抱又為王家添個娃娃，大仔王紹基榮升老竇，KK就做爺爺，心情有幾興奮可想而知。KK話，準備為小孫女搞百日宴，由於親友太多，以免掛一漏萬，所以諗緊低調咁同至親食番餐就算嘞。
爸爸獲頒東莞首席慈善家
我哋恭喜KK三喜臨門，佢話：「四喜至啱！」事關祖籍東莞嘅KK，爸爸輝叔當年創辦金城營造，不忘回饋祖國，多年嚟捐建學校同醫院嘅總額近兩億元，所以爸爸上個月獲東莞市政府頒授十大慈善家第一名，KK為爸爸感驕傲，呢個聖誕開心到爆！