政情：四叔親證子淇又有喜
新年新願望，一向恨抱男孫嘅恒基地產主席李兆基（四叔），繼大仔李家傑為佢帶來三個肥肥白白嘅男孫後，二仔李家誠同新抱徐子淇再為佢帶來新希望。早前曾傳出子淇已懷孕兩個半月，而且仲係雙胞男胎，始終未能證實，但四叔尋晚出席旅發局除夕倒數詠香江活動時，親口證實徐子淇懷有兩至三個月身孕，但就未知係咪雙胞男胎喎！
已懷孕兩至三個月
四叔尋晚由大女李佩雯陪同出席倒數活動，未見家傑同家誠兩兄弟，亦未見新抱涂子淇嘅蹤影。問及子淇係咪有咗身孕，四叔立即露出佢嘅招牌笑容、好開心咁話：「係呀！」佢透露子淇懷孕兩至三個月，身形同之前差唔多，但係個肚就大咗。至於係男孫定女孫、係咪雙胞胎，四叔都話暫時未知住。不過，四叔表明新年願望係子淇生男孫，否則會感到失望喎！
至於子淇是否安在家中養胎唔嚟得，四叔就答話：「天氣凍嘛！」又話平時都會煲啲花膠湯畀子淇補身，生完之後一定會獎勵吓新抱，總之對子淇第三胎充滿期待。