政情：傅家俊唔撐申亞

猶記得去年十一月底，申亞諮詢接近尾聲，十多位啱啱喺廣州亞運奪標嘅本地運動員，到立法會為申亞力挽狂瀾。單車金牌黃金寶一句「講亞運呢個議題好傷心」，更成為一時佳話。民意似乎因此稍為改變，支持嘅人有所上升，不過反對嘅依然無動於衷。

無份上立法會、但同樣喺亞運奪金嘅傅家俊，尋日現身香港精英運動員協會舉辦嘅「毅力十二愛心跑」時，被問到對申亞嘅睇法。佢坦然相告話：「我好矛盾，又想搞，但係民意好似唔係好贊成，又驚搞得唔好。如果民意又贊成又搞得好，我舉腳贊成添啦！」

珊珊對「反對黨」感失望

身為運動員嘅傅家俊，梗係想香港辦到一個成功嘅亞運會啦！之但係佢覺得從廣州所見，辦亞運需要好多配套及人力物力，即使廣州有國家做後盾，一樣有出錯。唔單止廣州，佢話正準備明年辦奧運會嘅倫敦，鬧出超支之餘，場地又起到亂七八糟，一啲奧運氣氛都無，同京奧完全係兩回事。佢苦口婆心咁話：「我唔想香港去到嗰時（二○二三年），好似依家倫敦咁。」所以對今次申亞，佢決定投棄權票；即係不表贊成。

至於出席同一場合嘅奧運金牌得主李麗珊，就繼續支持申亞，仲奇怪點解今次「連龍門都去唔到」。珊珊話，上次申亞非常順利，反而事隔十年，港隊成績又進步不少，經濟更唔係差咗，何以社會反對呢？佢話自己唔識政治，但對反對嘅政黨都感到失望。連本港精英運動員對申亞意見咁分歧，也難怪香港市民未能一致支持申亞喇！

講開又講，立法會財委會已定於本月十四日表決申亞撥款，咁啱嗰日港區全國人大代表及全國政協委員要拉大隊上深圳開「兩會」預備會。人大政協當中，民建聯立法會議員有四個，一向反對申亞嘅民建聯主席譚耀宗話，即使缺席預備會，民記成員都會留番喺香港投票，絕不退縮喎。