河粉好好味，魚蛋河粉超美味，乾炒牛河極惹味，唔講大家可能冇發覺，香港所謂嘅「炒貴刁」即係星馬流行嘅「炒粿條」，用料同樣係河粉。至於點解「粿條」變咗「貴刁」，咁就有勞語言學家研究研究嘞，大概係最原始嘅鄉下話發音接近啩。
搞乜鬼功夫茶忽然之間咁為食？哦，無他嘅，大時大節當前提醒各位一句啫，千祈要記住病從口入呀，尤其係東莞河粉，一定要諗過度過先至放入口，如果唔係，輕則屙嘔肚痛，重則癌魔上身，你都咪話唔濕滯！
即係咁，東莞市質量技術監督局最近抽查過多間河粉加工廠，發現河粉合格率只有少得可憐嘅百分之七。換言之，當地製造嘅河粉超過九成唔合格。一聽到咁恐怖嘅消息，睇怕連隔夜牛河都嘔番出嚟！
東莞河粉因乜事幹大部分唔合格嘅呢？講來講去又係錢作怪，奸商為咗降低成本，從而學香港聖公會大主教鄺保羅話齋「賺到盡、食到底」，所以選用經過漂白程序嘅發霉大米製成河粉出售。呢類咁嘅河粉唔止質素低劣，而且係有毒㗎，由於含有二氧化硫以及黃曲霉素，所以食後增加患上肝癌嘅風險！
呢嗱，香港人經常北上神州吃喝玩樂，東莞係大熱之選，佳節期間更加係絡繹於途。所以話啫，魚蛋河粉又好，乾炒牛河都好，唔好亂食呀。
唉，今時今日嘅中國人真係悲哀，假劣食品五花八門，防得呢一樣，難防嗰一味。今次再來一鑊毒河粉，萬一有受害者據理力爭要求討回公道，唔知又會唔會學似毒奶粉事件咁樣，一腳踢入冤獄，即使保外就醫都要人間蒸發，所謂出獄只不過係投向另一座無形監獄。
計功夫茶話齋，層出不窮嘅假劣食品歸根究柢係法制崩壞嘅惡果。大家不妨回想一下，當初三鹿牌毒奶粉係點樣形成嘅呢？咪就係官商勾結囉，奸商有錢使得鬼推磨，貪官隻眼開時隻眼閉，卒之搞出一個大頭佛。
好嘞，大家又睇睇各式各樣嘅假藥呀、毒酒呀、坑渠油等等，有邊一次唔係有人包庇縱容？就算被傳媒揭發醜聞，最普遍嘅情況係，高高舉起輕輕放下，大不了搵個二打六判監幾年，位高權重有財有勢嘅始作俑者一律逍遙法外。
前一排之嘛，河北揭發有廠家利用化學物品製造假紅酒，荒謬嘅係廠房之內其實安裝咗閉路電視作為監察用途，點不知一切形同虛設，奸商就喺天眼之下公然造假。如果你問功夫茶點解會咁，答案只有兩個可能性：第一，監察永遠是廢的；第二，黑錢永遠是好的。無論係邊一種可能性，同樣反映法制崩壞，咁咪包藏禍心囉，消費者以為飲啖紅酒享受人生啦，隨時飲到你要去見閻羅王。
點都好啦，凡事小心謹慎，切忌樂極生悲！