政情：官司燒銀紙 IT豪肉赤
終審法院早前裁定立法會選舉呈請結果可以上訴，意味着○八年立法會資訊科技界功能組別選舉落選人莫乃光，挑戰對手譚偉豪當選嘅官司可繼續打落去。IT豪尋日同傳媒聚會，被問起有冇畀官司影響心情時，就笑笑口搖頭嘆氣，話至今已拎咗幾百萬出嚟打司官，不知幾頭痕。
官司沒完沒了，但下屆立法會選舉就殺到埋身，IT豪話冇諗過轉戰直選，但就覺得組黨係未來政客必經之路，話如果佢下屆參選，唔會好似○八年咁，打正旗號話自己唔入任何政黨，但邊個黨先最能代表專業界別，IT豪就話要再觀察吓先決定。
除咗專注立法會，IT豪喺嚟緊特首選舉都有大計。IT豪深明散票冇人重視嘅道理，希望五散人喺支持下屆特首上有一致取態，咁到時就可以聯手施壓爭取業界利益。只不過五散人平時喺立法會投票都唔係次次一致，講到選特首咁大件事，有冇可能取態一致咁順利呢？