政情：沈祖堯冀再訪川送暖
做大學校長貴人事忙，但中大校長沈祖堯話幾忙都好，一年都會抽幾日去做義工幫四川地震災民。沈祖堯尋日下晝出席電台節目《義行多國度》啟播禮時話，○八年開始，佢每半年都去一次四川地震災區做義工，唔少義工經歷都令佢好難忘，最記得有次四川好凍，佢拎啲衫畀當地老人家，老人家一見到啲衫就喊到收唔到聲，原來老人家話雖然成日傳言話有物資送到災區，但一次都無到過手，直至見到佢送嘅衫先第一次受助，沈祖堯幫到人之餘，自己都好感動。
沈祖堯話，災後啲後生仔去外地搵食，留低老弱婦孺。佢會教啲小朋友學英文，又幫長者義診。佢話做咗校長忙好多，但期望每年點都可以抽幾日時間，籌組中大義工團去貧困地區做義工。佢計劃再去四川，或者去烏干達幫助愛滋病人，希望以身作則鼓勵中大學生多做義工。佢仲呼籲義工們唔好以為幫人係施捨，其實自己都會受惠不少，更加要融入當地真心幫人。