政情：蔡曉慧盼辦泳校授徒
特區政府對退役運動員嘅支援有幾多，事實勝於一切。前港隊游泳代表蔡曉慧尋日喺政府新聞網嘅訪問中話，佢嘅終極目標係開辦自己嘅游泳學校；即使困難重重，都會憑住永不言敗嘅精神堅持落去。連港隊代表都要自己創業謀求出路，可見政府對運動員嘅支援有幾多！
暑假先成立泳會
自去年東亞運退役後，蔡曉慧無停落嚟，讀書、寫專欄、做電視體育節目主持等，全部朝終極目標前進。曾經喺美國讀書、做過加州柏克萊大學泳隊隊長嘅佢，啱啱完成中大體育運動科學碩士課程，佢希望傳授自己十幾年游泳經驗畀下一代，但明白做嘢唔可以一步登天，所以決定出年暑假率先成立泳會，同全港百幾個泳會競爭，務求令港隊後繼有人。
其實好似蔡曉慧咁優秀嘅退役運動員，好應該用於幫手培訓本地新星，不過佢都選擇自己創一番事業，政府聽到真係要檢討吓啦！