政情：公文袋改選假民主
近期本港各大小政黨都先後爆發內訌，自由黨有田北辰跳槽，民主黨有改革派退黨，民協有廖成利劈炮，社民連嘅內訌內鬥更加係無日無之，最新又輪到公民黨，本以為可無風無浪自動當選嘅新一屆領導層，突然遭黨內元老加八十後黨員夾攻挑戰，矛頭直指角逐黨主席一職嘅陳家洛。雖然該黨高層宣稱今次改選乃君子之爭，體現黨內民主，不過候任黨魁梁家傑尋日突然違背中立原則，公開力撐陳家洛，難免令人質疑該黨只係假民主，今次改選隨時以爆冷收場。
公民黨執委會下周六改選，黨魁一職由袋巾傑自動當選，外務副主席黎廣德亦喺無對手下順利連任，但其餘三個高層職位都意外地出現競爭，當中以近年已淡出一線黨務嘅創黨元老鄭宇碩最矚目，佢突然報名同陳家洛爭做黨主席。同吳靄儀角逐內務副主席嘅八十後黨員胡栢麟，早前亦因為新界西支部修章爭議，同陳家洛開過拖，反映黨內出現一股不滿陳家洛嘅情緒。
屈鄭宇碩志在參與
陳家洛點解有咁多仇口？有說係佢搞選舉部署同青年組織工作時偏幫自己友，惹來上唔到位嘅黨員不滿。不過該黨一直否認此事，反而對外宣稱今次係本港歷來首個泛民政黨出現主席差額選舉，證明該黨有幾咁民主開放。有人仲明示暗示鄭宇碩只係志在參與，陳家洛最終都係會大熱當選。
不過，袋巾傑突然尋日同傳媒聚會時，卻令人覺得今次改選並非君子之爭咁簡單。事關聚會本來係講袋巾傑未來大計，但講唔夠幾句就轉咗話題，由袋巾傑助手代為宣讀陳家洛越洋發出嘅幾點聲明，澄清自己並非要透過參選主席染指立法會選舉。之後袋巾傑又大數陳家洛嘅功績，包括喺○五年參選特首時幫佢進行特訓、喺「五區公投」一役同佢合作無間等。但對於鄭宇碩當年一手籌組公民黨同帶病領導多場選戰，佢就隻字不提。
袋巾傑又強調，為公平起見，該黨今次特別成立咗個三人小組負責今次改選，同執委會劃清界線，確保各參選人都有均等機會向黨員宣傳拉票。不過話口未完，袋巾傑就自爆早已同幾位黨內高層，聯署支持咗陳家洛嘅競選政綱並廣發全黨。佢咁做即係明撐陳家洛喇，又何來公平中立呢？袋巾傑就解釋，聯署時唔知鄭宇碩會報名喎，真係好難令人相信。其實如果陳家洛真係穩勝，就毋須袋巾傑打破中立出嚟力撐喇！睇嚟下周六改選有戲睇。