中環出更：曾智雄牛一開P旺人氣

William奉旨開P，請嚟近百位親友及好友熱鬧吓，曾家兄弟上下一心，大哥曾智謀一家與細佬曾智明（Ricky）一家到場幫手打點。William心情靚爆，抱五個月大精靈B女，與產後極速修身嘅太太滿場飛招呼賓客。曾老太比佢更high，不時叮嚀工人捧出一盤又一盤燒烤美食及魚生、生蠔等，招呼賓客，又催促壽星仔上台唱K搞氣氛。爸爸曾憲梓因為行動不便，坐埋一邊感受歡樂氣氛。

到賀賓客不乏香港青聯兄弟班。曾經喺天匯交易中成為焦點嘅秦善文都罕有地與太太及一對仔女亮相，青聯常務副主席葉振都、副主席李永康等都嚟湊熱鬧，William仲叫埋三十幾位曾參加青聯學生交流網絡嘅精英大學生齊齊BBQ。

一眾青聯朋友向壽星公送上祝福，曾智雄同太太（前排右六、五）好開心。

曾憲梓（前右）見到成班後生仔好開心，仲逗秦善文嘅囝囝玩。

秦善文買唔成「天匯」，依然風騷，佢話政府出招只係「玩嘢」，喺美元疲弱下，掃物業保值仍係大勢所趨。佢又自爆將投資目標由香港轉往東南亞，替唔少豪客連環掃越南、馬來西亞等地豪宅，生財有道。

年年廿五歲 最緊要開心

講番壽星仔William，生日願望係最緊要開心，但佢怕醜唔肯透露幾多歲，笑言年年係「廿五」。早前佢做咗中總珠三角委員會主席，明年三月將喺廣州舉行經濟論壇，嚟緊周身唔得閒。細佬Ricky就啱啱歎完世界返嚟，歌星太太黎瑞恩透露一家四口遊澳洲度聖誕，happy到極！