楊孫西帶隊工展會掃貨
工展會開幕兩星期，有份推動復辦工展會嘅廠商會永遠名譽會長楊孫西，尋日同會長黃友嘉及副會長施榮懷，招呼民建聯核心遊工展會，楊孫西本身都係民記監委會主席，大家都係自己人。楊孫西帶頭花咗二千多元掃貨，買咗水壺及布袋等貨品，仲同民記主席譚耀宗各買一套價值二百九十八元嘅德國「孖人牌」廚剪，隨剪附送刀仔，售貨員話：「有刀有剪，有頭有面呀」，氹到兩人好開心。
卓妮尋日都有目擊兩個成功男士買廚剪嘅情況。楊孫西同譚Sir就親身剪雞肉試吓把廚剪，譚Sir大讚廚剪鋒利又流暢，於是決定買番套畀太太用。其後譚Sir又同珠姐譚惠珠各自買咗一斤靚花膠，每斤六百一十元，譚Sir再買湯包，內有花膠，佢話花膠有益喎。
唐唐出巡 街坊斥擾民
珠姐譚惠珠都不弱，去到北京同仁堂攤位時，買咗有補陰及抗衰老功效嘅「六味地黃丸」；民記副主席劉江華就買咗杞子同蓮子各一包，有助明目嘛。行到咁上下，施榮懷掏荷包用四十八元請民記班朋友食魚蛋同燒賣，個個食到津津有味。
黃友嘉話今年工展會人流同消費較去年好，主要受益於經濟市道，又預告工展結束後，農曆新年會帶隊去中東新興市場考察，尋找商機。政務司司長唐英年尋日都喺廿多個保安及政府人員保護下行工展會，現場有街坊大嗌擾民：「佢出我糧o架，使唔使咁多人保護呀！」