運輸運輸，運都輸埋，特區政府嘅運輸署可能真係改壞名，搞到頭頭碰着黑。原本呢，運輸署自己當黑都算嘞，最慘係呢個部門掌管全港命脈，就係好似血管咁重要嘅交通，官老爺當黑等於小市民遭殃，你都咪話唔大劑！
先睇下運輸署點樣當黑吖。冇耐前之嘛，申訴專員公署主動調查運輸署如何監管「亡命小巴」，得出嘅結論係，署方犯足五宗罪，包括遲遲冇處理好小巴安裝黑盒、安全帶以及限速器嘅問題。簡單咁講，由於運輸署監管不力，亡命小巴繼續頭搖又尾擺，小巴乘客隨時驚呼又狂嗌。你知啦，小巴奪命車禍真係多到冇人性，有時誇張到一嘢倒豎葱仆落行人隧道，運輸署簡直就係幫兇。
好嘞，講完小巴講校巴。大家又知唔知運輸署係點樣監管校巴嘅呢？關於呢個問題，有必要先同大家介紹兩個背景。第一個背景，運輸署自從○五年起收緊非專營巴士發牌制度，幾年以來基本上未試過發新牌，造成奇貨可居，牌照炒賣成風，好多校巴轉咗去做其他用途，例如中港跨境運輸。第二個背景，校巴業界唔鍾意用石油氣車，認為容易死火，增加維修成本，比較鍾意用柴油車，好衰唔衰運輸署又以環保為名唔准再賣柴油十六座小巴。
喺呢兩個背景之下，咁就出現咗一個古怪現象，業界利用「柴油大巴」改裝為校巴，將原本二十四至二十九個座位拆到只剩法例規定嘅十六座。哈，運輸署竟然又批准喎。
你知啦，中國人傳統性格係食得唔好嘥，校巴既然本來就係二十四至二十九個座位，變咗十六座之後當然騰出好多空間，學生哥可能覺得舒適寬敞，大老闆反而認為浪費資源。呢嗱，食得唔好嘥嘅真我本性又發揮作用嘞，不少校巴忽然之間多咗幾個座位，咁咪可以載多幾個客囉，咁咪可以賺多幾個錢囉。
功夫茶問問大家，校巴偷雞加位，座位拆完又裝，最容易出現乜嘢毛病？冇錯，就係座位不穩，萬一唔覺意發生車禍，小朋友連人帶位飛來飛去，後果可以係慘絕人寰。
事實上，今年開學後首兩個月，警方發現大約三十架學校私家小巴違法加設不穩固座位而提出檢控。喂喂喂，警方發現就話三十架啫，未發現又有幾多呢？普通車禍已經冇人願意見到啦，如果有等同超載嘅校巴出事，受害嘅將會係天真可愛嘅小朋友，錐心泣血不足以形容嗰種悲憤心情。
即係咁，運輸署成套政策都係暗藏殺機冇眼睇，一來將舊有嘅校巴踢去「不務正業」，二來令到新設嘅校巴變成「畸形兒童」。喺咁嘅情況之下，學生家長隨時又係頭頭碰着黑，輸運都尚在其次，最恐怖係連命仔都輸埋呀！
唉，好心運輸署署長黎以德生性啦，從速諗辦法撥亂反正。申訴專員伸你一腳已經瘀皮到極，係咪想全港家長都學似法官姪女咁摑你一巴呢？亡命小巴之外若然再加上「亡命校巴」，功夫茶應承你，一定瞄準閣下八月十五用盡全力一腳伸你出馬路！