政情：KK呻同囝囝聚少離多
工聯會黨團召集人黃國健（KK）有一個囝囝喺澳洲讀書同工作，政壇好多人都知，事關○九年立法會表決預算案，危危乎差啲唔夠票通過，KK喺赴澳出席囝囝大學畢業禮與留港投票撐政府之間，難以取捨，變成港府拉票戰嘅焦點，無人諗到，KK囝囝竟然一度成為左右預算案命運嘅關鍵人物。
時間好快過咗差唔多一年，KK嘅囝囝已經投身社會，留喺澳洲發展，選擇從事近年新興嘅財務策劃，而KK同囝囝長年分隔兩地嘅情況，就無改變過。好似今年聖誕節咁，好多政界人士都趁此黃金檔期同身處異地嘅家人相聚幾日，但KK同囝囝喺香港同澳洲各有各忙，聖誕節都要分開過，佢話，成年無見過個仔，佢老婆最掛心，日日一個長途電話，呢個聖誕節假期更加一日兩、三個，好彩依家打ＩＤＤ平咗好多，唔係荷包肯定好傷。