政情：4P組黨何鍾泰轉口風
西九新動力主席兼專業會議成員梁美芬早前透露，西九新動力內部開始討論組黨，其中一個考慮就係同專業會議合併，點知專業會議召集人何鍾泰一句「從未諗過」，打破梁美芬嘅組黨夢。可能何鍾泰事後覺得自己太口直心快，日前突然同我哋轉口風，話呢個世界乜嘢都有可能發生，唔知係咪想氹番梁美芬。
專業會議共有四名立法會議員，除九龍西梁美芬同來自工程界的何鍾泰，仲有測量、建築及都市規劃界劉秀成同地產建造界石禮謙，三位「襄王」早喺泛聯盟年代已經以鬆散聯盟形式合作，無拘無束，依家梁美芬突提組黨，真係考起何鍾泰。
講完「從未諗過」之後一個星期，何鍾泰對組黨口風轉軟咗，話其實早喺上屆立法會，泛聯盟都有研究組黨，只係泛聯盟喺立法會換屆後解散，組黨研究先至擱置，所以，專業會議同西九新動力唔係無可能結盟，只係無時間表咁話。說話留一線，日後好相見，何鍾泰忽然心明呢個道理。