政情：應家柏投訴馬場路牌混亂
馬會行政總裁應家柏（Winfried）喺馬會做咗十幾年，期間解決過唔少嘅難題，但有個難題困擾咗佢好耐仍未解決。
應家柏話，大埔公路沙田段向大埔及粉嶺方向嘅一個「馬場」路牌指示唔清晰，令唔熟路嘅駕駛人士被迫違例由中線切入慢線，再駛上通往沙田馬場嘅天橋，險象環生，有次Winfried仲幾乎收掣不及撞向突然由中線違例切入慢線嘅車輛。
Winfried過去先後向警務處及路政署投訴上述路牌不清晰，但兩個部門都話唔關佢哋事，原來係佢搵錯部門，有關路牌投訴應該搵運輸署至啱。不過，警方收到投訴都無幫手向運輸署反映，而且每逢賽馬日都派出多名交通警員到通往馬場嘅行車天橋守候，向違例切線嘅車輛炒牌，有意無意令駕駛人士誤墮陷阱。
本身係馬會會員嘅沙田區議會副主席彭長緯話，佢經常會使用有關路段入馬場，認同路牌指示確有唔清晰，唔熟路嘅駕駛人士當見到路牌指示時已經無得切入慢線，佢話會去信運輸署反映有關情況。