政情：陶君行一夜變白頭
社民連「維園阿哥」任亮憲嘅桃色風暴，除咗隨時將佢嘅政治前途斷送、令捲入事件嘅女受害人叫苦連天外，原來其黨主席陶君行亦係事件嘅「苦主」之一。任亮憲醜聞進一步深化黨嘅內訌，導致火頭處處，加上傳媒每日窮追猛打，啱啱先熬過倒閣風波嘅阿陶成為磨心。尋日佢去遊行示威時，更發現佢頭髮花白，面容憔悴。
任亮憲事件爆出後，阿陶一直處於兩難局面。黨內以長毛助理唐婉清為首嘅黨員一度發起聯署，要求公審任亮憲，更希望阿陶當機立斷同佢割席，以保黨聲譽。阿陶雖然即時表明反對「未審先判」，唔支持公審，但一向挺任嘅前黨主席黃毓民就越洋向佢開炮，批評佢就事件「打落水狗」，仲趁機踩佢冇能力領導社民連，鬧到阿陶一面灰。
任亮憲自爆出醜聞後，一直向外宣稱自己跌咗電話，只係肯將個新「冧巴」畀佢嘅身邊人，連身為主席嘅阿陶都冇面畀。喺外界怒插佢唔主動向任提供協助之時，原來阿陶打鑼都搵唔到佢，唔頭痕就假啦。
雖然阿陶只係上任年幾，但佢嘅主席生涯都幾坎坷。社民連月前因地區成立支部及是否參與泛民選舉協調機制問題而內訌，任亮憲同「滷味男」錢偉洛等人更發起倒閣行動。雖然陶內閣未被推翻，但足以令佢哋元氣大傷，秘書長季詩傑更因而退黨。其後又陸續爆出阿陶到夜總會「跳舞」嘅傳言，負面新聞此起彼落，聽講阿陶仲灰到向朋友訴苦：「究竟我做錯啲乜？」
「殘『民』瀆『憲』黑司法」
我哋尋日問阿陶係咪做到心力交瘁，佢似乎表現得有啲靦覥，但話任亮憲終於覆佢機，指自己已搵到律師，叫佢唔使擔心喎。社民連班友又唔知係咪有心玩嘢，尋日喺聲援趙連海嘅示威上，竟然出現「殘『民』瀆『憲』黑司法」嘅橫額，難免令人聯想到佢哋黨內內鬥情況嚴重。
另外，早前鬧爆任亮憲嘅周澄，一直都喺菲律賓做緊義工，原來佢係喺當地遊玩時，不慎畀扒手偷晒啲證件，先焗住返港補領，及時參與呢場桃色風暴。據悉佢已喺日前返回菲國，但喺網上世界係無疆界嘅，睇嚟佢都唔會忍得住袖手旁觀囉。