中環出更：項明生探索不丹快樂之謎
聖誕期間忙於亞洲遊戲展，連屋企都唔得閒返要住酒店嘅Sony Computer Entertainment Hong Kong Ltd市場部總經理項明生（James）忙完呢場年度盛事之後，元旦將去有「快樂的窮國」之稱嘅不丹旅行兼寫作，做番佢另一個身份－－旅遊作家。
James早前雖然忙到飛起，連聖誕佳節都唔可以陪身邊嘅人溫馨咁過，但佢好開心咁話，自己鍾意打機，又鍾意扮鬼扮馬玩角色扮演（Cosplay），真正係寓工作於娛樂。星期六元旦就會放假去玩啦！
自創快樂指數取代GDP
足迹遍布全球嘅James被不丹深深吸引，佢話，雖然當地生活貧窮，但快樂指數喺全球排名好高，更加係亞洲首位，當地仲自創國民快樂指數（GNH, Gross National Happiness），取代國內生產總值（GDP）來衡量國力，佢好想去探索貧窮生活令人開心嘅奧秘。
城中名人都好鍾意不丹，好似梁朝偉同劉嘉玲當年都係選擇喺嗰度舉行結婚儀式。卓妮睇過James出版嘅《足足五千年》旅遊書，好欣賞佢對世界各地風俗民情觀察入微，觸動心靈嘅寫作風格，同市面一般吃喝玩樂嘅旅遊書好唔同，希望佢快啲同大家分享令不丹人快樂嘅心靈雞湯啦！