中環出更：《愛上鄧麗君》音樂劇籌千萬
今年係歌星鄧麗君逝世十五周年，為咗紀念呢個時刻，民建聯協辦咗音樂劇《愛上鄧麗君》，民建聯副主席蔣麗芸（Ann）尋日同埋台前幕後人員現身鑽石山荷里活廣場。Ann姐透露民建聯透過音樂劇籌款籌到成千萬，可見鄧麗君嘅影響力非同凡響！齣劇嘅製作班底強勁，除咗有內地著名音樂劇製作人李盾、電影《色戒》編劇王蕙玲外，兩位女主角分別係有「小鄧麗君」之稱嘅李爍，以及全世界尋找鄧麗君傳人冠軍王靜。
Ann蔣友情價包場
Ann姐話早前佢喺北京睇過音樂劇排練，一聽到李爍唱歌就大受感動，兩位女角尋日亦有喺現場演繹鄧麗君嘅名曲《月亮代表我的心》、《小城故事》等，合埋眼聽猶如鄧麗君親自演繹，聽到卓妮如癡如醉。
《愛》劇由今年年底開始至明年一月八日公演，Ann姐話佢哋以友情價包起咗今個月卅日嗰場嘅所有門票，銀碼就不便透露啦！但係佢笑笑口話已籌到一千萬元咁多！所謂有華人嘅地方就有鄧麗君嘅歌聲，拍住齣劇籌款當然掂啦！
同場仲有音樂劇贊助商太子珠寶鐘錶執董朱繼陶Joseph及太太朱鄧麗萍，Joseph講笑話太太同鄧麗君都有淵源㗎，就係兩人嘅名字只差一個字，其實係佢兩個都好鍾意鄧麗君嘅歌至真。