功夫茶有一位略懂風水嘅朋友，以前嘅髮型係平頭陸軍裝，即係剷到接近光頭嗰種，後來見面發覺佢留長咗頭髮，當然好奇咁問一句：「搞乜鬼留長頭髮做飛仔呀？」點知呢位堪輿中人講咗一個搞笑得嚟又發人深省嘅答案，佢話：「風水遺囑效應吖嘛，雖然我冇哨牙，不過都唔想令人懷疑我係光頭神棍！」
功夫茶之所以諗起呢一個古仔，原因係立法會議員張國柱批評，不少慈善團體魚目混珠，但特區政府缺乏監管，長遠只會出現「劣幣驅逐良幣」，令慈善團體品牌貶值，影響慈善事業發展。張議員促請政府立法監管慈善團體籌款活動同財政運作，並且呼籲法律改革委員會盡快公布規管慈善團體嘅報告，然後諮詢公眾。
如果話一碌神棍可以薰臭整個堪輿業界，風水大師一個二個唔敢再剷光頭，照道理講一個呃神騙鬼嘅所謂慈善團體確係有可能影響慈善事業發展喎。即係咁，當你發覺原來街邊乞食嘅殘障人士忽然之間龍精虎猛跳起身走入豪華餐廳鋸扒，以後你一定唔會再向任何疑似可憐人士好心施捨個發財錢。
張國柱因乜事幹對於慈善團體咁有意見呢？原來呢位尊貴議員曾經做過九次街頭觀察，睇下慈善團體點樣籌款，跟手再檢視《稅務條例》第八十八條獲豁免繳稅嘅慈善機構及慈善信託名單。經過調查及研究之後，歸納出政府嘅監管有四大漏洞，包括任何喺警務處註冊嘅社團或者喺公司註冊處註冊為法團嘅機構，只要符合稅務局規定就可以註冊成為慈善機構或信託團體獲豁免稅項，手續容易到難以置信。更加令人不安嘅係，政府冇法例及部門規管慈善團體所得捐款嘅用途，錢來錢往係毋須交代㗎，慈善團體亦冇必要話畀人聽佢哋嘅協助對象係邊個。
嘩嘩嘩，講到呢度功夫茶有少少悔不當初，既然監管咁鬆懈，咁咪即係阿貓阿狗都可以自鳴清高話自己係大慈善家，然後伸大手板四出募捐？反正又唔使交代捐款用途，左手交右手中飽私囊你都唔知啦。功夫茶以前竟然冇發覺天下間居然有咁筍嘅「免稅行業」，假如識得利用笨官嘅漏洞廣納四方善財，一早發咗達啦，身家隨時係天文數字，哨牙光頭神棍都要行埋一邊！
呢嗱嗱嗱，功夫茶唔係指桑罵槐話所有慈善團體都係類似祈福黨嘅騙徒，之不過樹大有枯枝、族大有乞兒，加上傻頭傻腦嘅戇居官僚又基本上毫無監管可言，始終會有奸狡之徒利用善男信女嘅好心腸謀取不義之財吖嘛。
大家唔好忘記，慈善團體同宗教團體好多時候密不可分，既然滿天神佛嘅靈異世界都有咁多令人作嘔嘅敗類，邊個夠膽保證道貌岸然向你募捐嘅大慈善家唔係人面獸心嘅壞蛋？所以話啫，政府監管責無旁貸，唔好搞到真真正正菩薩心腸嘅慈善團體巧婦難為無米炊吖嘛，萬一「偽善團體」嚇到冇人願意捐錢，弱勢社群深受其害㗎。
咦，話時話，特區政府自己都醞釀推出關愛基金喎，又係伸大手板四出募捐。計功夫茶話齋，第一個要監管嘅就係主持關愛基金嘅政務司司長唐英年，千祈唔好畀佢搶晒其他慈善團體嘅水源！