民主黨上周有三十人宣布退黨，包括七個沙田、西貢同大埔區區議員，當堂令民主黨嘅新東勢力元氣大傷，該黨副主席劉慧卿尋日就話，最近已密鑼緊鼓同新東四個地區黨團開會，商討救亡方案，其中沙田區黨團就決定，集合全部黨團成員影張大合照，做埋橫額掛通街，既可以同街坊拜個早年，又可以令市民知道佢哋有幾團結。
不過黨員執位，市民可能都搞唔清邊個退咗黨，睇嚟啲橫額仲可以畀市民認清民主黨嘅成員。
卿姐話，雖然黨內有人離開，但地區團隊士氣都唔錯，而各有志參選區議會嘅黨員都積極落區，相信唔會影響部署，到現時為止亦未有民主黨人表示有興趣去狙擊退黨黨友。
不過，卿姐就覺得民主黨嘅第二梯隊需要諗吓計增加曝光率，佢又建議可以去多啲《城市論壇》做現場觀眾發表吓意見，起碼可以令多啲市民認得，聽到佢哋嘅諗法。至於有無成效就真係唔知嘞，不過話唔定可以製造另一個「維園阿哥」出嚟添！