政情：黃容根鬧爆希思路
歐洲大風雪癱瘓咗英國倫敦希思路機場，原來民建聯立法會議員黃容根都係苦主之一，事關佢本月中同廣東省廳級官員一齊去英國、蘇格蘭同荷蘭考察，了解當地農業、漁業嘅發展。點知機場關閉，搞到佢哋轉唔到機，令根哥被迫喺英國滯留四日，佢話經歷今次令佢明白難民心態！
根哥嘅考察之行本來由十二日到廿一日，但佢由十七日開始就滯留喺倫敦四日，事關機場關閉，佢買唔到機票去荷蘭。根哥話，為咗張機票，日日都要去機場撲來撲去，最慘係結果都買唔到，苦無法子之下，卒之喺前日買咗歐洲之星火車飛，兜個圈經比利時再去荷蘭，趕及去阿姆斯特丹考察。
其實根哥已經算好彩，事關佢哋有內地官員同旅行社陪同，旅行社幫佢搞掂好滯留期間嘅住宿問題。不過依然一肚火嘅根哥，大鬧嗰幾日希思路機場直頭無人指揮一樣，亂晒大龍，見到其他旅客，令佢深深體會何謂難民心態。尋晚根哥終於由荷蘭飛返上海，再坐飛機返香港，能夠平安返港過聖誕，乜都抵番晒啦！